GAROOWE – Wasiir ku-xigeenka Maaamulka Wasaaradda Maaliyadda Puntland, Wasiiru-dowlaha Wasaaradda, Xisaabiyaha Guud ee Dowladda iyo ku-xigeenkiisa ayaa maanta si rasmi ah ula wareegay xilalkooda.

Munaasabadda xil wareejinta oo lagu qabtay Xarunta dhexe ee Wasaaradda ayaa waxaa goob joog ka ahaa guddiga xil wareejinta Wasiir ku-xigeenka Dakhliga, Agaasimaha Guud ee Wasaaradda, Agaasime ku-xigeenka Dakhliga, Agaasimeyaasha waaxyaha iyo saraakiil kale oo ka tirsan Wasaaradda.

Agaasimaha Guud ee Wasaaradda Maaliyadda Dowladda Puntland Mudane Axmed Jaamac Jowle oo ka hadlay munaasabadda xil wareejinta ayaa madaxda cusub siiyay warbixin guud oo ku saabsan habraaca iyo hannaanka shaqo ee Wasaaradda.

Sidoo kale, Wasiir ku-xigeenka Dakhliga ee Wasaradda Maaliyadda Puntland Mudane Ahmed ayaa si diirran ugu soo dhoweeyay madaxda cusub Wasaaradda.

Madaxii hore ee xilalka wareejiyay ayaa iyaguna ka warbixiyay shaqooyinkii ay qabteen, muddadii ay xilka hayeen iyagoo u mahadceliyay dhammaan shaqaalaha Wasaaradda ee la soo sheqeeyey.

Dhankooda, madaxda cusub ayaa u mahadceliyay masuuliyiintii ka horreysay waxayna bogaadiyeen shaqooyinka ay soo qabteen isla markaana ballanqaadeen inay sii xoojin doonaan howlaha shaqo ee xarumahaasi Wasaaradda.

Baahintii

Xafiiska Waycy-gelinta iyo Warfaafinta Wasaaradda Maaliyadda Dawladda Puntland

GAROOWE – Wasiir Ku-xigeenka Wasaaradda Maaliyadda Dowladda Puntland ayaa maanta goobjoog ka ahaa shir muhiim ah oo lagu kala saxiixday heshiis ku saabsan habaynta iyo kala xaddeynta canshuuraha u dhexeeya Dowladda Hoose iyo Dowladda Dhexe.

Shirka waxaa goobjoog ahaa Wasiirka Wasaaradda Deegaanka, Wasiirka Wasaaradda Arrimaha Gudaha, Wasiirka Wasaaradda Ganacsiga, Agaasimaha Guud ee Wasaaradda Maaliyadda, Agaasimaha Guud ee Wasaaradda Arrimaha Gudaha iyo mas’uuliyiin kale oo ka tirsan Wasaaraddaha kulanka ka qaybgalay.

Shirkan ayaa qayb ka ahaa kulamo horay udhacay ujeedkiisuna ahaa in la helo nidaam mideysan oo lagu maareeyo canshuuraha si loo xoojiyo wada shaqeynta hay’adaha dowladda iyo kor u qaadista dakhliga.

Heshiiskan waxaa si wadajir ah uga shaqeynayey guddiyo ka kala socday Wasaaradda Maaliyadda, Wasaaradda Arrimaha Gudaha, Wasaaradda Ganacsiga, Wasaaradda Kalluumeysiga, Wasaaradda Caddaaladda, Wasaaradda Duulista iyo Garoomada, iyo sidoo kale Xafiiska Hanti-dhowrka Guud.

Shirkan ayaa lagu gaaray heshiis wax ka beddel ku sameynaya qaabka loo kala qaato canshuuraha Dowladda Hoose iyo Dowladda Dhexe iyadoo la dejiyay hannaan cad oo hufan oo labada dhinac u sahli doona fulinta waajibaadkooda maaliyadeed.

Ugu dambeyn, heshiiskan ayaa la filayaa inuu door weyn ka qaato xoojinta nidaamka maaliyadeed ee Puntland iyo kor u qaadista hufnaanta iyo isla xisaabtanka hay’adaha dowladda waxaana saxiiyey Wasiiradii goobjoga ahaa.

Baahintii

Xafiiska Wayi-gelinta iyo Warfaafinta Wasaaradda Maaliyadda Dawladda Puntland

GAROOWE – Agaasimaha Guud ee Wasaaradda Maaliyadda Dowladda Puntland, Mudane Ahamed Jama Jowle, ayaa daah-furay tababar ay ka faa’iidaysanayaan shaqalaha toddoba wasaaradood iyo Bangiga Dhexe ee Dowladda Puntland, kaas oo ka furmay Xarunta Dhexe ee Wasaaradda Maaliyadda.

Tababarkan waxaa bixinaya koox khubaro ah (team) oo horay loogu soo tababaray adeegsiga hababka casriga ah ee falanqaynta dhaqaalaha (Economic Models)

Ujeeddada ugu weyn ee tababarkan ayaa ah xoojinta awoodda hay’adaha dowladda ee ku aaddan ururinta, falanqaynta iyo adeegsiga xogaha dhaqaale, si go’aannada iyo qorsheyaasha dowladda ay u noqdaan kuwo ku dhisan xog sax ah.

Agaasimaha Guud ee Wasaaradda Maaliyadda Dowladda Puntland, Mudane Ahmed Jama Jowle oo ka hadlay munaasabadda daah-furka tababarka, ayaa carrabka ku adkeeyay muhiimadda uu tababarkani u leeyahay hay’adaha dowladda isagoo xusay in adeegsiga xog sax ah iyo falanqayn cilmiyeed ay saldhig u tahay horumar dhaqaale.

Tababarkan ayaa la qorsheeyay in uu socdo muddo laba maalmood ah waxaana ka qaybgalaya xirfadlayaal ka kala socda wasaaradaha iyo Bangiga Dhexe ee Dowladda Puntland.

Baahintii

Xafiiskii Wacyigelinta iyo Warfaafinta Wasaaradda Maaliyadda Dawladda

GAROOWE – Madaxda Wasaaradda Maaliyadda Dowladda Puntland waxay bogaadinayaan dadaalka iyo ka-qaybgalka Agaasimeyaasha Guud iyo Agaasimeyaasha Waaxyaha Qorsheynta iyo Dabagalka ee Hay’adaha Dowladda Puntland.

Mas’uuliyiintan ayaa si guul leh u soo gabagabeeyay tababar socday muddo shan (5) maalmood ah kaas oo diiradda lagu saarayay xoojinta, horumarinta iyo tayeynta nidaamka dowladnimo,qorsheynta iyo dabagalka hay’adaha Dowladda Puntland.

Dowladda Puntland waxay adkeynaysaa muhiimadda ay leeyihiin tababarro noocan ah, kuwaas oo door muhiim ah ka qaadanaya tayeynta awoodda shaqaalaha, xoojinta isla xisaabtanka iyo hirgelinta hannaanka maamul ee casriga ah ee Dowladda.

Xafiiska Wayi-gelinta iyo Warfaafinta

Wasaaradda Maaliyadda Dawladda Puntland

BOOSAASO – Wasiirka Maaliyadda Puntland, H.E. Maxamed Faarax Maxamuud uuna weheliyo Guddoomiye Ku-xigeenka 1-aad ee Golaha Baarlamaanka Dowladda Puntland Mudane Maxamed Baari Shire ayaa shahaado sharafyo iyo bilado kala duwan gudoonsiiyey qaybaha kala duwan ee ku suntan horumarka dakhliga dawladda.

Wasiirka ayaa dhiirigelin iyo mahadnaq isugu daray:

1. Ganacsatada doorka weyn ku leh kobaca dhaqaalaha.
2. Shaqaalaha & Masuuliyiinta muujiyey hufnaan iyo shaqo wanaag.
3. Ciidanka Turbotaayrada iyo Booliska ee u taagan sugidda amniga iyo nidaamka furdooyinka.

Hambalyo dhammaan shaqaalaha iyo hawlwadeenada Furdooyinka Puntland!

#WorldCustomsDay #Puntland #CustomsDay2026

BOOSAASO – Madaxda Wasaaradda Maaliyadda Dowladda Puntland ayaa caawa shir la yeeshay ganacsatada gobolka Bari.

Shirka waxaa goob joog ka ahaa Wasiirka Wasaaradda Maaliyadda, Wasiirudowlaha Wasaaradda Maaliyadda, Wasiir ku-xigeenka Maaamulka Wasaaradda, Agaasime Guud Ku-xigeenka Maamulka, Agaasime Guud Ku-xigeenka Dakhliga, Gudoomiye Ku-xigeenka Gobolka Bari, Ganacsatada Gobolka Bari iyo madax kale oo ka tirsan Wasaaradda.

Kulan kan ayaa qayb ka ah shirkii xalay kaas oo ganacsatadu codsadeen si loo helo faham guud oo ku saabsan cashuurta GST oo qaadisteeda ay wado Wasaaradda Maaliyaddu.

Intii uu shirku socday waxaa la is weydiiyay su’aalo guud oo ku saabsan fahamka cashuurta GST taasi oo mas’uuliyiinta Wasaaradda Maaliyaddu faham xoogan ka siiyeen Ganacsatada Gobolka Bari.

Wasiirka Wasaaradda Maaliyadda Dowladda Puntland Mudane Maxamed Farax Maxamuud ayaa u mahadceliyay ganacsatada sida ay u muujiyeen rabitaankooda fahamka guud isaga oo ku dhiirrigeliyay in ay sii xoojiyan bixinta canshuuraha ku waajibay ganacsigooda.

Ugu dambeyntii kulan ayaa ku soo dhamaaday isfaham waxaana la sameeyey guddi farsamo oo ka kooban Wasaaradda Maaliyadda iyo ganacsatada waxana ka wada shaqayn doonaan hormarinta canshuuraha.

Baahintii

Xafiiska Wayi-gelinta iyo Warfaafinta

Wasaaradda Maaliyadda Dawladda Puntland

BOOSAASO – Wasaaradda Maaliyadda Dowladda Puntland ayaa magaalada Boosaaso ku qabatay Madasha Ka Qayb-galka Muwaadiniinta ee Miisaaniyadda 2026.

BOOSAASO – Wasaaradda Maaliyadda Dowladda Puntland ayaa magaalada Boosaaso ku qabatay Madasha Ka Qayb-galka Muwaadiniinta ee Miisaaniyadda 2026.

Kulankan waxaa goob joog ka ahaa Wasiirka Wasaaradda Maaliyadda, Wasiir-ku-xigeenka Wasaaradda, Wasiir-dowlaha Wasaaradda,

Agaasime-ku-xigeenka Maamulka, Agaasime-ku-xigeenka Guud ee Dakhliga, maamulka gobolka, ganacsatada, iyo masuuliyiin kale oo ka tirsan Wasaaradda iyo maamulka gobolka.

Ujeedka kulanka ayaa ahaa in bulshada loo soo bandhigo qorshaha miisaaniyadda sannadka 2026 isla markaana looga jawaabo su’aalaha iyo talooyinka ka imanaya qaybaha kala duwan ee bulshada iyo ganacsatada.

Madaxda Wasaaradda ayaa ka jawaabay su’aalo kala duwan oo laga weydiiyay miisaaniyadda.

Madashan ayaa fursad u siisay muwaadiniinta iyo ganacsatada inay si toos ah u weydiiyaan su’aalo ku saabsan sida cashuuraha iyo dakhliga dowladda loo maareeyo.

Baahintii

Xafiiska Wayi-gelinta iyo Warfaafinta

Wasaaradda Maaliyadda Dawladda Puntland

GAROOWE – Madaxda Wasaaradda Maaliyadda Dowladda Puntland ayaa maanta kulan la yeeshay Garsoorka Sare ee Puntland.

Kulankan oo ka qabsoomay xarunta dhexe ee Wasaaradda Maaliyadda waxaa ka qayb galay

Wasiirka Wasaaradda Maaliyadda ayna weheliyaan Wasiirku xigeenka dakhliga iyo Agaasimaha Guud ee Wasaaradda Maaliyadda iyo Madaxa Garsoorka.

Ujeedka kulanka ayaa wada shaqaynta hay’adaha Maaliyadda iyo kuwa garsoorka Intii uu kulanku socdayna waxaa si qoto dheer looga wada hadlay arrimo la xiriira habraacyada wada-shaqaynta labada dhinac gaar ahaan Fulinta canshuha lacageed ee ku waajibay dacwadaha iyo in la

kormeero gobollada.

Ugu dambayn, labada dhinac ayaa isla qaatay in la sii amba-qaado wada shaqaynta joogtada ah lana xoojiyo isku-xirka hay’adahan si loo gaaro hannaan shaqo oo wanaagsan iyo koror Dakhli.

Baahintii

Xafiiska Wayi-gelinta iyo Warfaafinta Wasaaradda Maaliyadda Dawladda Puntland.

GAALKACYO – Wasiirka Wasaaradda Maaliyadda Dowladda Puntland ayaa maanta si rasmi ah xarigga uga jaray dhismaha cusub ee Wasaaradda Maaliyadda ee Gobolka Mudug.

Munaasabadda xarig-jarka waxaa soo qabanqaabiyey Xafiiska Xisaabiyaha Gobolka Mudug, oo uu hoggaamiyo Mudane Ismaaciil Cabdinuur Geesay, kaas oo faahfaahin ka bixiyey habka loo dhisay xarunta cusub, baahiyaha jira iyo sida dhismahan casriga ahi u kordhinayo tayada adeegyada Wasaaradda. Waxa uu uga mahadceliyay Wasiirka Maaliyadda sida uu u garab istaagay hirgelinta mashruucan muhiimka ah.

Munaasabadda xarig-jarka waxaa ka soo qaybgalay Gudoomiyaasha Gobolka Mudug ee Puntland iyo Galmudug, Gudoomiyasha Degmada Gaalkacyo ee Puntland iyo Galmudug, masuuliyiinta Garsoorka,masuuliyiinta Dowladda Puntland ee gobolka, Nabadoonada iyo Ururka haweenka

Madaxda ka hadlay munaasabadda furitaanka, ayaa si weyn u bogaadiyey Wasaaradda Maaliyadda doorka muhiimka ah iyo shaqada ay ka hayso horumarinta dakhliga iyo maamulka Maaliyadda.

Wasiirka Wasaaradda Maaliyadda Dowladda Puntland Mudane Maxamed Faarax Maxamuud ayaa dhankiisa ku ammaanay madaxda iyo shaqaalaha Wasaaradda dadaalka ay muujiyeen, isagoo xusay in horumarka la gaadhay uu yahay mid ku imanaya wada-shaqayn, isla xisaabtan iyo maamulka hufan. Wasiirku wuxuu adkeeyey in aan wax horumar ahi suurtagal noqon karin la’aanta nidaam maamul iyo shaqo wadajir ah, sigaara Wasiirku wuxuu ugu mahadceliyay Xisaabiyaha Gobolka Mudug Ismaaciil C/nuur Geesey uu ku tilmaamay masuul hawlkar ah Wasaaraddana kusoo kordhiyay hormar balaaran.

Sidoo kale, Wasiirka ayaa sheegay in Dowladda uu hoggaamiyo Madaxweynaha Dowladda Puntland Mudane Siciid Cabdullaahi Deni ay ka go’an tahay hirgelinta dhismaha hay’adaha Dowladda taas oo qayb ka ah siyaasadda guud ee Madaxweynaha ee lagu horumarinayo adeeggada dowliga ah.

Ugu dambayntii, Wasiirka Wasaaradda Maaliyadda Dowladda Puntland ayaa tilmaamay in Wasaaraddu ay wado mashaariic dhisme oo kale duwan oo ka socda xarumo kala duwan oo Wasaaradda ah iyadoo horay u hirgelisay dhismayaal kale oo muhiim u ah shaqada Wasaaradda.

Wasiirka Wasaaradda Maaliyadda iyo Xisaabiyaha Gobolka ayaa bilad sharaf gudoonsiiyay Shirkadda Tawer oo hirgalisay dhismahaan.

Baahintii

Xafiiska Wayi-gelinta iyo Warfaafinta Wasaaradda Maaliyadda Dawladda Puntland