GAROOWE – Wasiirka Wasaaradda Maaliyadda Dowladda Puntland, Mudane Maxamed Faarax Maxamuud uuna weheliyo Wasiir Ku-xigeenka Dakhliga, Mudane Axmed Maxamed Bulxan, ayaa maanta si wadajir ah xariga uga jaray dhismaha cusub ee Kastamka Garoonka Diyaaradaha General Maxamed Abshir ee magaalada Garowe.

Munaasabadda xarig-jarka waxaa goob joog ahaa Agaasimaha Guud ee Wasaaradda Maaliyadda, Maareeyaha Garoonka Diyaaradaha General Maxamed Abshir, Xisaabiyaha Gobolka Nugaal, Agaasime Ku-xigeenka Kastamada, iyo mas’uuliyiin kale oo ka tirsan Wasaaradda Maaliyadda.

Ugu horreyn, Xisaabiyaha Gobolka Nugaal, Mukhtaar Cabdi Faarax ayaa madaxda Wasaaradda uga mahadceliyey hirgelinta dhismahan cusub, isagoo xusay in xaruntani ay wax weyn kusoo kordhin doonto adeegyada Garoonka Diyaaradaha, gaar ahaan dhinacyada kororka dakhliga iyo tayeynta adeegyada shacabka.

Agaasimaha Guud ee Wasaaradda Maaliyadda Dowladda Puntland Mudane Axmed Jaamac Jowle, ayaa isna tilmaamay in dhismahan cusub uu ka kooban yahay hool kayd ah iyo xafiisyo shaqo oo loogu talagalay shaqaalaha Kastamka. Wuxuu sheegay in xaruntani ay qeyb ka tahay qorshaha Wasaaradda ee ku aaddan horumarinta kaabeyaasha shaqo iyo casriyeynta adeegyada maaliyadeed.

Ugu dambeyn, Wasiirka Maaliyadda, Mudane Maxamed Faarax Maxamuud, oo ku hadlayay afka madaxda Wasaaradda, ayaa sheegay in dhismahani uu qeyb ka yahay dadaallada joogtada ah ee lagu horumarinayo Wasaaradda Maaliyadda. Wuxuu xusay in xaruntani ay si weyn uga qayb qaadan doonto fududeynta howlaha kastamka iyo kobcinta dakhliga Garoonka Diyaaradaha General Maxamed Abshir.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Wasiirka wasaaradda Maaliyada Mudane Maxamed Faarax Maxamuud uuna weheliyo Wasiir ku-xigeenka Dakhliga Mudane Axmed Maxamed Bulxan ayaa gudoomiyey shirka xisaabiyeyaasha gobalada ee Wasaaradda Maaliyadda.

Kulankan waxaa ka qaybgalay Gudoomiyaha Hantidhawrka guud ee Dawlada Puntland, Agaasimaha guud ee Wasaaradda Maaliyadda, Xisaabiyaha guud, Agaasime Ku-xigeenka Dakhliga, agaasimaayasha waaxyaha Miisaaniyada, Cashuuraha beriga iyo Xisaabiyayaasha Gobalada.

Kulankan intii uu socday ayaa xooga lagu saaray sidii ay xisaabiyeyaasha gobaladu ay xooga u saari lahaayeen hagaajinta niidamyada kharash bixinta Iyo dakhli xaraynta ee gobalada.

Gudoomiyaha Hantidhawrka guud Mudane Cismaan Maxamuud Cali oo  xisaabiyeyaasha gobalada la wadaagay wax yaabihii ay Ku arkeen xisaab-xirkii sanadkii hore ee uu baahan in la saxo ayaa xisaabiyeyaasha gobalada kula dardaarmay in ay xooga saaraan hufnaanta nidaamka maaliyadeed ee Dalka.

Sidoo kale Agaasimaha guud ee Wasaaradda Maaliyadda Maaliyadda Axmed Jaamac Jowle Iyo Xisaabiyaha guud Cali Jaamac Gaashaan ayaa balan qaaday inay xoojin doonaan isla xisaabtanka Iyo dabagalka shaqada iyagoo dhankooda Ku booriyey inay xisaabiyeyaasha gobladu dardargeliyaan shaqada.

Wasiirka Wasaarada Maaliyada Mudane Maxamed Faarax Maxamuud oo Soo xiray kulanka ayaa xisaabiyeyaasha gobalada kula daardaarmay inay xooga saaraan hagaajinta xisaabaadka Dawladda Iyo kor u qaadista dakhliga ayna si buuxda u dhaqan geliyaan talooyinka xafiiska Hantidhawrka guud.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Agaasimaha guud ee Wasaarada Maaliyadda Dowladda Puntland Mudane Axmed Jaamac Jowle ayaa maanta kulan la qaatay Xisaabiyayaasha Gobalada ee Wasaaradda Maaliyada oo magaalada Garowe u yimi shirkii Maamul baahinta iyo dardargalinta dakhliga.

Kulankan oo ahaa xog iswaraysi Ku aadan shaqooyinka hortabinta u leh Wasaarada Maaliyada ee Goboladda ayuu Agaasimuhu warbixino ka dhagaystay Xisaabiyayaasha halka shaqadu u marayso,

Ugu dambayn Axmed Jaamac Jowle Agaasimaha guud ee Wasaaradda Maaliyadda ayaa Xisaabiyayaasha

kula dardaarmay inay xooga saaraan hagaajinta Iyo dardargelinta shaqooyinka kala duwan gaar’ahaan kor u qaadista dakhliga.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Wasiirka Wasaaradda Maaliyadda Dowladda Puntland Mudane Maxamed Faarax Maxamuud iyo xubno ka tirsan Golaha Wasiirada ayaa xalay ka qaybgalay kulan dhex maray Dowladda iyo dadweynaha Puntland.

Bulshada kulanka ka qayb gashay ayaa su’aalo ku weydiiyey Golaha Xukuumadda Dowladda Puntland ee kulanka ka qayb galay loogana hadlay wax qabadyadii Xukuumadda.

Kulanka bulshada iyo Golaha Xukuumadda ayaa soconaya labo cisho kaasi oo u jeedkiisu yahay isla-xisaabtan daah-furan ku aadan waxqabadka Dowladda.

GAROOWE – Wasiirka Wasaaradda Maaliyadda Dowladda Puntland Mudane Maxamed Faarax Maxamuud oo uuna weheliyo Wasiir ku-xigeenka Dakhliga Mudane Axmed Maxamed Bulxan ayaa shir gudoomiyay Kulan ay la qaateen madaxda Wasaaradda.

Kulan waxaa ka qaybgalay Agaasimaha guud ee Wasaaradda Maaliyadda. Agasime guud ku-xigeenka Dakhliga, ku simaha Xafiiska Xisaabiyaha Guud iyo Agaasimayaasha Xafiisyada Dakhliga, Xisaabaadka guud iyo Miisaaniyadda waxana ay Wasiirada la wadaageen warbixin iyo dardargalinta Shaqada Wasaaradda oo guulo wax ku ool laga gaaray.

Ugu dambayn Wasiiradda ayaa Mas’uulyiinta kulan ka ka qaybgalay kula dardaarmay dadaal dheeri ah oo ku aadan dardargalinta shaqooyiinka Wasaaradda.

Baaahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Madaxweynaha Dowladda Puntland Mudane Siciid Cabdulaahi Dani ayaa daah-furay Shirweynaha 1aad ee Bangiyada & Maaliyadda Puntland.

Wasiirka Wasaaradda Maaliyadda Dowladda Puntland Mudane Maxamed Faarax Maxamuud, xubnaha labad Gole ee dowladda iyo Madaxda Bankiga Dowladda Puntland aayaa kulan ka qaybgalay.

Shirweynahan oo kii ugu horreeya ee Bangiyada iyo Maaliyadda Puntland oo Puntland ka qabsooma ayaa waxaa soo agaasimay Bangiga Dowladda Puntland.

*Cinwaanka shirka sanadkan:*

➡️ *”Helitaanka iyo Ka Mid Noqoshada Adeegyada Maaliyadeed ee Puntland”*

Shirka ayaa diiradda lagu saarayaa:

– Sidii kor loogu qaadi lahaa adeegyada maaliyadeed ee laga heli karo Puntland

– Doorka bangiyada gaarka loo leeyahay iyo kuwa dowladda

– Horumarinta ka mid noqoshada dhaqaale ee bulshooyinka

Shirkan waa mid muhiim u ah kobaca dhaqaalaha Puntland iyo dhisidda nidaam maaliyadeed oo loo dhan yahay.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GARACAD – Wasiirka Wasaaradda Maaliyadda Dowladda Puntland, Mudane Maxamed Faarax Maxamuud, oo ay weheliyaan wefti ka socday labada gole ee dowladda Puntland, ayaa si rasmi ah xariga uga jaray xafiisyada cusub ee Wasaaradda Maaliyadda oo laga hirgeliyey gudaha dekedda Garacad ee gobolka Mudug.

Xafiisyadan cusub ayaa loo dhisay si casri ah, isla markaana si buuxda loogu qalabeeyey agabkii iyo tiknoolajiyaddii lagama maarmaanka u ahayd shaqada dowladeed, gaar ahaan nidaamyada maaliyadeed iyo canshuuraha. Waxa ay noqon doonaan xarumo si ku-meel-gaar ah ugu wada shaqeeya Wasaaradaha Dowladda Puntland, iyada oo la sugayo dhismaha xarumo gaar ah oo u gaar ah hay’adaha kale ee dowladda.

Wasiirka Maaliyadda, oo ka hadlay munaasabadda xarig-jarka, ayaa sheegay in dhismahan uu ka mid yahay qorsheyaasha muhiimka ah ee Wasaaradda ee ku aaddan baahinta adeegyada maaliyadeed iyo sugidda maamulka dakhliga gudaha ee dowladda, isaga oo xusay muhiimadda dekedda Garacad ay u leedahay kobcinta dhaqaalaha Puntland.

“Xaruntaan cusub ee aan maanta xariga ka jaray waxay muujinaysaa ballanqaadka dowladda ee ku wajahan horumarinta xarumaha dowladeed ee salka ku haya hufnaanta, isla xisaabtanka, iyo maamul wanaagga,” ayuu yiri Wasiirku.

Mudane Maxamed Faarax Maxamuud wuxuu xusay in qorshaha Wasaaradda uu yahay in dhammaan meelaha muhiimka u ah dakhliga dalka laga hirgeliyo xarumo rasmi ah oo u diyaarsan adeegyo casri ah oo lagula xisaabtamo ilaha dakhliga, lana kordhiyo wax-soo-saarka iyo hab-maamulka maaliyadeed.

Intaa kadib, Wasiirka iyo masuuliyiinta kale ee dowladda waxay kormeer rasmi ah ku tageen dhismaha warshadda kalluunka ee laga hirgelinayo Garacad, taas oo ay maalgelinayaan ganacsato deegaanka u dhashay. Warshaddan oo dhisayo si casri ah ayaa la filayaa in ay noqoto mid muhiim u ah horumarinta warshadaha kalluumaysiga, korna u qaado fursadaha shaqo ee dhalinyarada deegaanka, iyo sare u qaadista wax-soo-saarka dalka ee loo dhoofiyo suuqyada caalamiga ah.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Wasiir ku-xigeenka Dakhliga ee Wasaaradda Maaliyadda Dowladda Puntland, Mudane Axmed Maxamed Bulxan, ayaa maanta shir guddoomiyay kulan muhiim ah oo lagu qabtay aaladda fogaan-aragga, kaas oo diiradda lagu saaray dardargelinta iyo kor-u-qaadista dakhliga canshuuraha berriga.

Wasiirka waxaa shirka ku wehliyay Agaasimaha Guud ee Wasaaradda Maaliyadda, Mudane Axmed Jaamac Jowle, waxaana ka soo qeyb galay Agaasime Ku-xigeenka Guud ee Dakhliga, Agaasimaha Waaxda Canshuuraha Berriga, iyo dhammaan maamulayaasha Canshuuraha Berriga ee gobollada Puntland.

Shirkan oo si joogto ah u qabsooma 10-kii maalmoodba mar, ayaa looga gol leeyahay kormeerka iyo qiimeynta waxqabadka maamulka dakhliga, gaar ahaan horumarinta iyo meel-marinta qorshaha sanadeedka 2025.

Maamulayaasha Canshuuraha berriga ee gobollada ayaa madaxda kulanka la wadaagay warbixino faahfaahsan oo ku aadan waxqabadkooda, caqabadaha ay la kulmeen, iyo fursadaha horumarineed ee jira. Sidoo kale, waxaa lagu soo bandhigay talooyin iyo aragtiyo lagu xoojinayo habsami-u-socodka hawlaha maamulka canshuuraha.

Kulanka ayaa lagu falanqeeyay guulaha la gaaray, waxyaabaha aan weli la hirgelin, iyo tallaabooyinka mudnaanta leh ee lagu xoojinayo hufnaanta, waxtarka, iyo wax-soo-saarka dakhliga gudaha, si loo gaaro yoolalka dhaqaale ee Dowladda Puntland.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAALKACYO – Wasiirka Wasaaradda Maaliyadda Dawladda Puntland Mudane Maxamed Faarax Maxamud, oo ay weheliyaan Wasiiradda Wasaaradaha Caafimadka, Xannaanada Xoolaha, Kaluumaysiga, Waxbarashadda, Wasiirudowlaha Madaxtooyadda, Wasiir kuxigeenka howlaha guud, Maamulka Gobolka iyo kan degmada ayaa maanta xariga kajaray dhismaha Cusub ee Kastamka dhexe ee Gaalkacyo Wasaaradda Maaliyadda G/Mudug.

Munaasabadda xarrig jarka  dhismahan ayaa waxa faahfaahin ka baxshay Xisaabiyaha Wasaaradda Maaliyadda Gobolka Mudug mudane

Ismaaciil C/nuur Geesey, Isagoo sheegay in kharashka kubaxay dhismahan ay bixisay Wasaaradda Maaliyadda bulshadana loogu shaqayn doono, Wasiirkana Maaliyaddana uga mahadceliyey hirgalinta dhismayaasha Wasaaraddu ka wado Gobolka Mudug

Wasiirka Maaliyadda dawladda Puntland Mudane Maxamed Faarax Maxamud ayaa umahad ceshay xisaabiyaha Gobolka isagoo ku amaanay sidii uu uga shaqeeyey hirgalinta dhismahan iyo Hormarinta shaqada iyo Dakhliga Wasaaradda Gobolka Mudug.

Wasiirka ayaa sheegay in dhismahan iyo dhismaha wali socda ee xarrunta Wasaaradda Maaliyadda Gobolka Mudug ay labadaba lacagta ku baxasay ay bixisay Wasaaradda Maliyadda oo ka bixinaysa cashuurta laga qaado dadweynaha reer Puntland.

Dhinaca kale Wasiirka Maaliayadda iyo Mas’uulyiinta dawlada ayaa kormeeray goobo kala duwan oo ka mid yihiin Suuqa xerro dayax, Isbitaalka guud, Dugsiyada hoose dhexe ee Bardacad, ummadda, Xarunta Wasaaradda Maaliyadda G/Mudug, Qaybta Police-ka G/Mudug iyo Radio Galkacyo

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Ku-simaha Madaxweynaha ahna Madaxweyne Ku-xigeenka Dowladda Puntland Mudane H.E Ilyas Osman Lugatoor oo ku jira kormeerka xarumaha Hay’adaha Dowladda, ayaa maanta kormeeray xarunta dhexe ee Wasaaradda Maaliyadda, halkaasi oo ay kusoo dhoweeyeen Masuuliyiinta Wasaaradda.

Madaxweyne Ku-xigeenka ayaa  warbixin ka dhegaystay Masuuliyiinta Wasaaradda, isagoo boggaadiyay dadaalka kor loogu qaadayo dakhliga, kobaca dhaqaalaha iyo dhiirigelinta Ganacsiga iyo Maalgashiga Puntland.

Madaxweyne Ku-xigeenka ayaa qeyb qeyb u booqday xafiisyada kala duwan ee xarunta Wasaaradda, wuxuuna si gaar ah u kormeeray dhismaha cusub ee lagu kordhiyay Wasaaradda Maaliyadda oo hadda meel gebo gebo ah maraya, isagoo tallaabadaasi ku boggaadiyay masuuliyiinta Wasaaradda iyo Shirkada dhisaysa ee Gondogooye.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland