GAALKACYO – Wasiirka Wasaaradda Maaliyadda Dowladda Puntland, Mudane Maxamed Faarax Maxamuud, oo safar shaqo ku jooga magaalada Gaalkacyo, ayaa maanta booqasho kormeer ah ku tagay xarunta Wasaaradda Maaliyadda ee Gobolka Mudug, halkaas oo ay ka socdaan dib-u-dhis casri ah oo lagu horumarinayo xafiisyada Wasaaradda.

Xisaabiyaha Wasaaradda Maaliyadda ismaacil Cabdinuur Geesey oo ay wehelinayaan Maamulaha Canshuuraha Gobolka Mudug, Cabdullaahi Khaliif Cabdille, iyo Maamulaha Canshuuraha Berriga ee Gobolka, Maxamuud Cabdullaahi (Kadawe) ayaa Wasiirka halkaasi ku soo dhoweeyey.

Wasiirka ayaa  kormeeray qeybaha kala duwan ee xarunta, gaar ahaan meelaha ay ka socdaan howsha dhismaha iyo casriyeynta, waxaaana warbixin ku saabsan horumarka shaqada wasiirku ka dhageystay maamulka iyo injineerada fulinaya dhismaha.

Wasiir Maxamed Faarax ayaa bogaadiyey dadaalka maamulka gobolka iyo shaqaalaha Wasaaradda ee ku aaddan horumarinta kaabayaasha xarunta, wuxuuna sheegay in dib-u-dhiska xarumaha maaliyadda uu qeyb weyn ka yahay kobcinta hufnaanta iyo daahfurnaanta nidaamka maaliyadeed ee Puntland.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

BOOSAASO – Xarunta Cashuuraha Berriga waxaa kormeer shaqo ku tagay Agaasimaha guud ee Wasaaradda Maaliyadda Mudane Axmed Jaamac Jowle.

Agaasimaha waxaa halkaasi ku soo dhoweeyey Maamulaha Canshuuraha Berriga Gobolka Bari, Taliyaha Ilaalinta Canshuuraha Gobolka Bari iyo Saraakiisha Canshuraha Beriga.

Kulan uu Agaasimahu la qaatay Mas’uuliyiinta Cashuuraha beriga ayaa looga wada-hadlay qiimaynta iyo kor u qaadista dakhliga canshuuraha berriga ee Gobolka Bari, iyadoo laga eegayo ogaanshaha hawlaha Dakhliga ee Socda.

Sidoo kale kulankan ayaa lugu falanqeyey halka ay marayaan ilaha dakhliga hadda jira, gaar ahaan canshuuraha ay bixiyaan mulkiilayaasha gaadiidka ee laga qaado canshuurta 3biloodlaha ah iyo ganacsiyada kala duwan ee Magalada Bosaso

Intii uu socday kulankan ayaa la isla qiray in ay jiraan ilaha canshuuraha qaarkood oo aan si buuxda loo qaadin, loona baahan yahay in la gaaro Yoolalka Dakhli ee u dagsan Wasaradda Maaliyadda Gobolka Bari.

Agaasimaha ayaa Madaxda iyo shaqaalaha Wasaaradda Maaliyadda faray inta lagu guda jiro  ololaha canshuuraha in Ganacsatada iyo bulshada kalaba loo dhimriyo, si wanagsan-na loola dhaqmo, iyadoo la raacayo nimaadyada iyo habraacyada Canshuraha Dowladda Puntland oo siinaya muwaadiniinta xaquuqdooda aas-aasiga ah in aan wax loo gaysan, mar walbana laga codsado in ay gacan siiyaan saraakiisha ku hawlan canshuraha Dowladda.

Ugu dambayn tii kulanka ayaa la isla qaatay in si joogto ah loo qabto kulamo lagu wacyi gelinayo Bulshada iyo Ganacsatada Magaalada Bosaso, kuwaas oo lagu fahansiinayo bixinta Canshuraha iyo la shaqaynta saraakiisha ku hawlan ururinta Canshuraha Dowladda.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Wasiirudowlaha Dowlaha Wasaaradda Maaliyadda Dowladda Puntland Mudane Maxamuud Shiikh Ciid ayaa maanta shir muhiim ah kula yeeshay shaqaalaha Wasaaradda Maaliyadda ee xarunta dhexe ee magaalada Garoowe.

Shirkan ayaa diiradda lagu saaray isla xisaabtan ku aaddan hawlaha shaqo ee Wasaaradda, kor u qaadista hufnaanta adeegyada ay bixiso, iyo sidii loo dardargelin lahaa waajibaadka shaqo ee horyaalla xilligan shaqaalaha.

Wasiirudowlaha ayaa la wadaagay shaqaalaha muhiimadda ay leedahay wada shaqeynta joogtada ah, isla xisaabtanka hufan, iyo ka shaqeynta horumar waara oo lagu gaarsiiyo Wasaaradda heerar cusub. Wuxuu sidoo kale xusay in waajibka shaqaalaha uu yahay mid qaran, loona baahan yahay in si hufan, daacadnimo leh, iyo masuuliyad sare ku dheehan tahay loogu adeego bulshada Puntland.

Dhanka kale, Wasiirku wuxuu tilmaamay in Wasaaradda Maaliyaddu ay dadaal xooggan ku bixinayso kor u qaadista dakhliga, horumarinta nidaamyada maaliyadeed ee casriga ah, iyo tayeynta shaqaalaha si loo gaaro yoolalka Dowladda Puntland.

Shirkan waxaa ka qaybgalay Ku-xigeenka Xisaabiyaha Guud ee Dowladda Puntland,

Agaasime Ku-xigeenka Maamulka, Agaasime guud Ku-xigeenka Dakhliga, Agaasimayaasha waaxyaha iyo shaqaalaha Wasaaradda Maaliyadda.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

BOOSAASO – Agaasimaha guud ee Wasaaradda Maaliyadda Dowladda Puntland Mudane Axmed Jaamac Jowle oo howlo shaqo u jooga magaalada Boosaaso ayaa kormeer shaqo ku tagay Kastamka Dekedda.

Agaasimaha ayaa booqaday goobaha ay ka socdaan shaqada dejinta badeecadaha ay wadaan Doonayaha, maraakiibta iyo shaqada dakhliga ee ay gacanta ku hayso Wasaaradda Maaliyadda Dowladda Puntland.

Kormeerkan ayaa qayb ka ahaa dadaallada joogtada ah ee lagu xoojinayo horumarinta nidaamyada casriga ah ee canshuuraha dowladda Puntland.

Intii uu Agaasimaha guud ku sugnaa Dekedda Bosaso, waxaan si gaar ah diiradda u saaray hannaanka maamulka dakhliga, habraacyada farsamo ee ay isticmaalaan shaqaalaha Wasaaradda Maaliyadda, iyo sida nidaamyada cusub ee canshuur ururinta loogu adeegsado kor u qaadista wax-soo-saarka iyo dakhliga dowladda.

Axmed Jaamac Jowle Agaasimaha guud ayaa bogaadiyay shaqada adag ee ay hayaan shaqaalaha dekedda oo shaqadoodu tahay mid socota labada gelinba, taasoo muujinaysa dadaalka iyo waxtarka dekeddu u leedahay kobcinta dhaqaalaha Puntland.

Kormeerkan ayaa qeyb ka ah istaraatijiyadda guud ee dowladda Puntland ee lagu horumarinayo ilaha dakhliga, iyadoo la adeegsanayo teknoolojiyad casri ah iyo xoojinta kartida shaqaalaha Wasaaradda Maaliyadda.

Agaasimaha guud ee Wasaaradda Maaliyadda kormeerkan waxaa ku weheliyey Maamulaha Furdooyinka gobolka Bari, Agaasime ku xigeenka Furdooyinka, Taliyaha Dekedda iyo Mas’uulyiin kale oo ka tirsan Wasaaradda.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Kulan uu shir Gudoomiyey Wasiirudowlaha Wasaaradda Maaliyadda Mudane Maxamuud Shiikh Ciid uuna weheliyo Wasiir ku xigeenka Wasaaradda Arrimaha Gudaha, Federaalka iyo Dimuqraadiyeynta Mudane Cabdiraxmaan Khaliif Faarah ayaa lagu qabtay Xarunta dhexe ee Wasaaradda.

Shirkan ayaa looga wadahadley qodobadaan hoose:-

1. Dib u eegista iyo is waafajinta 28 madax ee canshuuraha ay qaadaan Dawladaha

Hoose ee Degmooyinka Puntland.

2. Dhamaystirka Xeerka Canshuuraha midaysan ee Dawladaha Hoose.

Dood dheer kadib waxaa laga heshiiyey inta badan qodobada dooda la geliyey ee canshuuraha isku dhex-jiray oo gaarayey ilaa 13 canshuurood.

Kulankan waxaaa ka qaybgalay

Agaasimaha Guud ee Wasaaradda Arrimaha Gudaha , Agaasime ku xigeenka guud ee Maamulka Wasaaradda Maaliyadda,, Agaasime ku xigeenka guud ee Dakhliga Wasaaradda Maaliyadda, Guddoomiyaha Degmada Gaalkacyo, Guddoomiyaha Degmada Qardho iyo Mas’uulyiin kale oo ka tirsan Dowladda.

Ugu dambeyntii waxaa shirka labada Wasaaradood ka soo saari doonaan warbixin dhamaystiran oo lala wadaagayo dhammaan Hay’adaha kale ee ay qusayso ee Dawladda Puntland.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE- Madaxda Wasaaradda Maaliyadda Dowladda Puntland ayaa xarunta Golaha Baarlamaanka kula kulmay Guddiga Maaliyadda, Dhaqaalaha iyo Xisaabaadka Golaha Baarlamaanka.

Wasiirudowlaha Wasaaradda Maaliyadda, Xisaabiyaha guud ee Dawladda, Agsaaimaha Guud ee Wasaaradda Maaliyadda,Agaasimaha waaxda Miisaaniyadda iyo saraakiil kale oo ka tirsan Xafiiska Xisaabaadka ayaa Guddiga la kulamay.

Kulankan wuxuu qayb ka yahay hawlaha kormeerka, baarista iyo hubinta ee Guddigu ku sameynayo Xisaab-xirka, si waafaqsan waajibaadka uu Dastuurku farayo iyo Qodobada Xeer-hoosaadka Golaha Wakiillada.

Ujeeddada kulanka ayaa ahayd in la helo xog dhab ah oo lagu qiimeeyo hannaanka maamul iyo maaliyadeed ee lagu fuliyey miisaaniyadda sanadkaas.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Madaxda Wasaradda Maaliyadda Dowladda Puntland ayaa kulan la yeeshay Mas’uuliyiin ka tirsan Hay’adda  Save Children.

Kulanka waxaa ka qaybgalay Ku-simaha Xisabiyaha Guud, Gudoomiyaha Hantidhowrka Guud, Agaasimaha Bangiga Puntland , Madaxa Hay’adda Save Children ee Puntlnad iyo xunbno ka socday xafiiska Xisaabiyaha Guud iyo Hayadda Save Childrn.

Kulanka intii lagu guda jiray ayaa looga wada-hadlay sida uu u shaqeeyo nidaamka PL-FMIS iyo Khasnada. Midaysan (Treasury Single Account)

Madaxda Wasaaradda Maaliyadda ayaa

mudooyinkii udambeesay kulamo joogto ah la lahayd hayadaha caalamiga si loo dar dar galiyo isticmaalka nidaamka Khasnada Midaysan ee Puntland (Treasury Single Accunt) ayaa guulo wax ku ool ah laga gaaray.

Kulanka oo ahaa miro dhal ayaa kusoo dhamaaday sidii loo sii amba qaadilahaa isticmaalka Khasnada Midaysan ee Dawladda Puntland

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

GAROOWE – Maxdada Wasaaradda Maaliyadda ayaa Golaha Baarlamaanka Dowladda Puntland maanta u gudbiyey Xisaab-xirka Miisaaniyadda 2024.

Fadhiga Golaha waxaa Shir Gudoomiyey Guddoomiyaha Golaha Mudane Cabdirisaaq Axmed Siciid uuna weheliyo Guddoomiye ku-xigeenka 2-aad, Mudane Maxamed Maxamuud Ciise.

Wasiirka Wasaaradda Maaliyadda, Wasiirudowlaha Wasaaradda, Xisaabiyaha guud ee Dawladda, Agaasimaha guud ee Wasaaradda iyo Mas’uulyiin kale ayaa ka qaybgalay gudbinta Xisaab-xirka ee Golaha Baarlamaanka la hor geeyey.

Wasiirka Wasaaradda Maaliyadda Dowladda Puntland Mudane Maxamed Faarax Maxamuud ayaa Golaha ka hor jeediyey khudbad la xiriirta Xisaab-xirka Miisaaniyadda sannadka 2024,

Xisaab-xirka ay soo diyaariyeen Madaxda Wasaaradda Maaliyadda ayaa lagu wareejiyey Guddiga Maaliyadda, Dhaqaalaha iyo Xisaabaadka ee Golaha Baarlamaanka Dowladda Puntland.

Guddiga Maaliyadda, Dhaqaalaha ee Golaha Golaha ayaa lafilayaa in ay Xisaab-xirka ku samayn doonaan akhrinta labaad. Waxaa la filayaa inay Golaha dib ugu soo celiyaan 29-ka Luulyo 2025, si dood iyo go’aan rasmi ah loogu gaaro sida mas’uuliyiinta Goluhu sheegeen.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

EYL – Agaasimaha Guud ee Wasaaradda Maaliyadda Dowladda Puntland, Mudane Axmed Jaamac Jowle ayaa si rasmi ah xariga uga jaray xarunta cusub ee Wasaaradda Maaliyadda ee degmada Eyl ee gobolka Nugaal.

Munaasabadda xarig-jarka waxaa Agaasimaha Guud ku wehelinayey Ku-simaha Xisaabiyaha Guud ahna Ku-xigeenka Xisaabaha, iyadoo ay sidoo kale goob-joog ka ahaayeen maamulka degmada Eyl, xisaabiyaha gobolka Nugaal, iyo saraakiil kale oo ka tirsan Wasaaradda Maaliyadda.

Intii ay munaasabadda socotay, qaar ka mid ah masuuliyiinta ka hadlay ayaa tilmaamay muhiimadda weyn ee xaruntani u leedahay degmada Eyl, gaar ahaan dhinaca horumarinta maamulka iyo kobcinta dakhliga gudaha. Waxay sheegeen in xaruntani ay fududeyn doonto adeegyada maaliyadeed, isla markaana ay sare u qaadi doonto hufnaanta iyo isla xisaabtanka maamulka dakhliga.

Masuuliyiintu waxay si gaar ah u bogaadiyeen Wasaaradda Maaliyadda Dowladda Puntland iyo hoggaankeeda sare, dadaalka ay ku bixiyeen sidii loo gaarsiin lahaa adeegyada maaliyadeed dhammaan gobollada iyo degmooyinka dalka.

Furitaanka xaruntan cusub ayaa qeyb ka ah qorshaha ballaaran ee Wasaaradda Maaliyaddu ku dooneyso in la xoojiyo hanaanka maaliyadeed ee dowladnimo, laguna gaaro adeeg hufan oo u dhow shacabka Puntland.

Agaasimaha Guud ee Wasaaradda Maaliyadda, Mudane Axmed Jaamac Jowle, ayaa xusay:

“Waxaan si weyn ugu faraxsanahay in aan maanta furo xarunta cusub ee Wasaaradda Maaliyadda ee degmada Eyl. Xaruntani waa tallaabo muhiim ah oo ka tarjumeysa himilada Wasaaradda ee ah in adeegyada dowladda laga hirgeliyo dhammaan degmooyinka Puntland.

Baahintii

Xafiiska Wacyi-gelinta iyo Warfaafinta Wasaaradda Maaliyadda Dowladda Puntland

BOOSAASO – Wasiir Ku-xigeenka Dakhliga Wasaaradda Maaliyadda Dowladda Puntland Mudane Ahmed Mohamed Bulhan oo howlo shaqo u jooga Boosaaso ayaa kormeeray xarunta  Kastamka Wasaaradda ku leedahay Dekedda xili ay halkaasi ka socdeen shaqooyinkii cashuurista badeecadaha ay keenaan Doonayaha iyo maraakiibta.

Sidoo kale wasiirka ayaa booqday xarunta Cashuuraha bariga ee Gobolka bari.

Booqashada Wasiirka ee goobaha dakhliga ayaa salka ku haysa dardargalinta dakhliga iyo hormarinta shaqada Wasaaradda Maaliyadda.

Intii uu kormeerka shaqo ku guda jiray Wasiir Bulxan waxa uu booqday Xafiisyada iyo Shaqaalaha ka hawlgaga kastamka iyo Cashuuraha Berriga waxana uu la kulamay Mas’uulyiinta goobaha uu booqday iyaga oo Wasiirka la wadaagay xogo ku aadan heerka dakhliga, shaqooyinka socda iyo baaha ka jira goobaha uu booqday.

Ugu dambayn Wasiirka ayaa madaxda iyo shaqaalaha uga mahad celiyey shaqada adag ee ay hayaan  xili cimilada Boosaaso tahay mid kulul waxana uu kula dardaarmay in la dardar-galinliyo dakhliga sigaar ahna xooga la saaro Cashuuraha Berriga.

#Baahintii

Xafiiska Wacyi-gelinta iyo Wasaaradda Maaliyadda Dowladda Puntland