GAROOWE- Wasaaradda Maaliyadda Dowladda Puntland ayaa kulan wadatashi iyo dardargalinta dakhliga la qaatay Madaxda shirkadaha bixiya tamarta korontada Puntland.

Shirkan waxaa ka soo qayb galay Wasiir Ku-xigeenka Dakhliga Waasaradda Maaliyadda, Agaasimaha guud ee Wasaaradda Maaliyadda, Agaasime guud ku-xigeenka Dakhliga, Wasaaradda Korontada, Biyaha iyo Macdanta,
Wakaalada Horumarinta korontada iyo Shirkadaha bixiya adeegga korontada Puntland.

Maareeyaha Guud ee Wakaaladda Horumarinta Korontada Puntland Mudane Maxamed Abshir Muuse oo Faah-faahin ka bixiyey ujeedada shirka ayaa sheegay inuu ku saabsan yahay iskaashi dhexmara hay’adaha Dowlada iyo shirkadaha bixiya adeegga korontada oo uu sheegay in midba kan kale u baahan yahay sidii uu gacan uga heli lahaa.

Wasiir Ku-xigeenka Wasaaradda Biyaha, Korontada iyo Macdanta Puntland Mudane Saciid Salaad ayaa sheegay inay wasaaradu diyaarisay siyaasadii lagu maamuli lahaa korontada Puntland dhawaana ay soo bandhigi doonaan.

Wasiirka ayaa tilmaamay inay Dowladu ku mashquulsan tahay sidii loo horumarin lahaa adeegga korontada Puntland, loona gaarsiin lahaa guud ahaan deegaanada Puntland iyadoo laga faaidaysanaayo wax yaabaha dabiiciga ee korontada laga dhaliyo oo ay kamid yihiin qoraxda iyo dabaysha si uu Wadanku u helo koronto jaban Oo soo jiidata maalgashiga ganacsiga iyo warshadaha.

Wasiir Ku-xigeenka Dakhliga Wasaaradda Maaliyadda Puntland Mudane Axmed Bulxan ayaa isagu tilmaamay inay korontadu tahay hal-bowlaha nolosha ayna waajib tahay inay Dowladu mas’uuliyad dheeri ah iska saarto sidii loo taageeri lahaa, isagoo dhanka kalena sheegay inay shirkadaha ganacsigana ay waajib dastuuri ah ku tahay inay bixiyaan Cashuuraha Ku waajibay, wuxuuna ugu baaqay inay si mas’uuliyadi ku dheehan tahay u bixiyaan cashuuraha ku waajibay sida cashuurta adeegga raacda(GST) iyo Cashuurta mushaarka shaqaalaha.

Agaasimaha Guud ee Wasaaradda Maaliyadda Mudane Axmed Jaamac Jowle ayaa dhankiisa uga mahadceliyey wakaaladda horumarinta korontada oo soo abaabushay shirkan, wuxuuna sheegay inay gaabis tahay bixinta cashuurta shirkadaha bixiya adeegga korontada wixii hada ka danbeeyana xooga la saaro, sidoo kale wuxuu sheegay inay Dowladu diyaar u tahay garab istaaga shirkadahan oo adeeg muhiim ah u haya bulshada, ayna iminka wadada kusoo jiraan mashaariic muhiim ah oo lagu taageeraayo adeegga korontada Puntland.

Agaasime Ku-xigeenka dakhliga Wasaarada Maaliyada Mudane Cabdulqaadir Axmed Xaashi ayaa ugu dambayn ka codsaday shirkadaha bixiya korontada inay mas’uuliyad dheeri ah iska saaraan cashuur bixinta, isagoo tilmaamay shirkadii aan bixin cashuurta in laga hor istaagi doono taageerada Dowlada, hay’adaha Caalamiga iyo Cashuur dhaafyada kala duwan.

Ugu dambayn Wasaaradda Maaliyadda ayaa shirkadaha korontada usoo bandhigtay nidaamka ay u maraayaan bixinta cashuurta iyo Cashuuraha ku waajibay shirkadahan.

Baahintiia

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland

GAROOWE- Agaasime Guud Ku-xigeenka Dakhliga Wasaaradda Maaliyadda Puntland Mudane Cabdulqaadir Axmed Xaashi oo ay weheliyaan Saraakiisha Dakhliga ayaa xarunta dakhliga ku qaabilay mas’uulyiin ka socday Hay’adda UNOPS oo ka yimi magaalada Nairobi.

Waftiga imaanshahooda Puntland gaar ahaan xarunta dakhliga ayaa qayb ka ah wada shaqaynta labada dhinac Hay’adda iyo Wasaaradda Maaliyadda Puntland.

Cabdulqaadir Axmed Xaashi ayaa mas’uuliyiinta ka codsaday in gacan laga siiyo sidii ay Wasaaradda Maaliyadda uga caawin lahaayeen cashuurista mashaariicda ay bixiyaan kuna guulaystaan shirkadaha Soomaaliyeed iyo kuwa ajaaniibta ee ka hawl gala Puntland.

Mas’uulyiinta Hay’adda UNOPS ayaa dhankooda ballan qaaday in Wasaaradda Maaliyadda kala shaqayn doonaan cashuurista mashaariicda Socda ee ay wadaan iyo kuwa imaan doona wada shaqayn dhowna la yeelan doonaan.

Ugu dambayn kulanka ayaa laysku afgartay dhammaan waxyaabihii looga wada hadlay labada dhinac.

Baahintii

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland

GAROOWE- Labada Wasaaradood ee Maaliyadda iyo Ganacsiga ee Dowladda Puntland ayaa kala saxiixday Heshiis ku aadan horumarinta ganacsiga, wadashaqaynta labada Wasaaradood iyo kor u qaadida dakhliga dowladda Puntland.

Kulankan oo ka dhacay xarunta dhexe ee Wasaaradda Maaliyadda, saacdo koobana qaatay ayaa looga wada hadlay xogo badan oo ku aadan siidi loo horumarin lahaa heshiiskan una noqon lahaa mid guulo badan laga gaaro.

Ugu dambayn Wasiirka Wasaaradda Maaliyadda iyo Wasiirka Wasaaradda Ganacsiga ayaa siixay Heshiis kan si uu u noqdo meel marah.

Baahintii

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland

GAROOWE – Wasaaradda Maaliyadda Dowladda Puntland ayaa Hadhimo Sharafeed saagootin ah u sameeysay mas’uuliyiintii loo soo gabagabeeyey tababarkii ku aadanaa dakhliga.

Munaasabada saagootinta waxaa ka soo qayb galay Wasiir Ku-xigeenka Dakhliga, Agaasime guud ku-xigeenka Maamulka, ku-xigeenka Agaasimaha guud ee Dakhliga iyo mas’uulyiin kale.

Agaasime guud ku xeenka dakhliga Mudane Cabdulqaadir Axmed Xaashi ayaa mas’uuliyiinta Wasaaradda uga mahad celiyey sida hufan ee ay u qateen tababarkii loo qabtay, waxana uu u rajeeyey shaqo wanaag iyo dakhliga oo kor loo qaado.

Mudane Mahdi Faarax Qambi Agaasimaha Furdooyinka Puntland oo ka mid ahaa mas’uuliyiintii ka hadashay halkasi ayaa xusay in tababarkan uu watey laba faa’ido oo ay ka mid yihiin isbarasho iyo aqoon kororsi dhanka dakhliga ah.

Ugu Dambayn tii Wasiir kuxigeenka Dakhliga Wasaaradda Maaliyadda Mudane Axmed Maxamed Bulxan oo kulankan ka hadlay ayaa la dardaarmay mas’uuliyiinta Dakhliga kuna dhiiri geliyey in ay si hufan u gutaan waajibaadkooda shaqo, lagana sugaayo dakhligii lagu hormarin lahaa dalka.

Baahintii

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland

GAROOWE – Shahaado la gudoon siiyey Maamulayasha Dakhliga sagaalka gobol, Ciidamada ilaalada cashuuraha, Ciidamada nabadgalyada waddooyinka, Macalimiin iyo khuburo ka tirsan Wasaaradda Maaliyadda Dowladda Puntland.

GAROOWE- Wasiir Kuxigeenka Maaliyadda ahna Kusimaha Wasiirka Mudane Eng Cabdulaahi ismaaciil Maxamed ayaa soo xiray tababar lagu baranayey kicinta cashuuraha Berriga iyo Furdooyinka.

Xafladda oo ka dhacay xarunta dhexe ee Wasaaradda Maaliyadda, waxaa ka soo qayb galay Wasiir Kuxigeenka Dakhliga, Wasiir Kuxigeenka Wasaaradda Ganacsiga iyo Warshadaha, Taliyaha guud ciidamada Booliiska, kuxigeenka Xeer ilaaliyaha guud, Agaasimaha guud ee Wasaaradda Maaliyadda, Agaasime guud Ku-xigeenada Wasaaradda, kuxigeenka Xisaabiyaha Guud iyo mas’uulyiin kale.

Maamulayaasha dakhliga sagaalka gobol, Ciidamada ilaalada cashuuraha iyo Ciidamada nabadgalyada wadooyinka oo muddo seddex beri ah qaadanayey casharo la xiira Xeerka cashuuraha Berriga iyo Tacriifada furdooyinka ayaa ugu danbayntii ku guulaystay in la soo xero.

Mas’uulyiinta Wasaaradda Maaliyadda Puntland ayaa la baray aqoon badan oo la xiirta shaqooyinka ay bulshada u hayaan waxana bixinaayey macalimiin iyo Khabiiro ka tirsan Wasaaradda Maaliyadda oo aqoon durugasana u leh kicinta dakhliga.

Dhinaca kale Madaxda Wasaaradda Maaliyadda ayaa mas’uuliyiinta Booliska iyo xeer ilaalinta ka codsaday in gacan laga siiyo siidii sharciga loo horgayn lahaa dadka cashuur diid ka ah si taalabo looga qaado.

Taliyaha guud ee Ciidamada Booliska iyo ku xigeenka xeer ilaaliyaha guud ee dowladda ayaa ballan qaaday dhankooda in ay Wasaaradda Maaliyada gacan ka siin doonaan in sharciga la hor geeyo dadka cashuur diid ka ah.

Ugu dambayn dhammaan Madaxdii ka qayb gashay xaflada ayaa maamulayaasha dakhliga gobolada kula dardaarmay Casharadii ay qaateen laga dareemo xarumihii ay ka yimaadeen.

Baahintii

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland

GAROOWE – Waxaa maanta xarunta Dhexe ee Wasaaradda Maaliyadda Dowladda Puntland ka furmay tababar loo qabtay Madaxda iyo shaqaalaha cashuuraha Berriga iyo Furdooyinka ee dhammaan gobolada Dowladda Puntland.

Daah-furka tababarka waxaa goob-joog ahaa Wasiir Ku-xigeenka Wasaaradda, Wasiir Ku-xigeenka Dakhliga, Agaasimaha Guud, Agaasime Guud ku-xigeenka Dakhliga, Agaasime guud ku-xigeenka Maamulka iyo Agaasimayaasha Waaxyaha.

Tababarka ayaa waxaa ka faa’iidaysan doona dhammaan Saraakiisha Cashuuraha Berriga ee gobolada, waxaana mudada u socon doono lagu bari doonaa hannanka Tacriifada cashuur qaadista iyo cashuuro kale oo la xiira Dakhliga.

Agaasimaha Guud ee Wasaaradda Maaliyadda Mudane Axmed Jaamac Jowle oo ka hadlay Furitaanka Tababarka ayaa xusay in tababarkan uga faa’iidaystaan Tacriifada la ansixiyey ee la casriyeeyey, Sharcigii Cashuuraha Berriga iyo sharcigii PFM, waana muhiim in aad ka faa’idaysataan tababarka.

Dhinaca kale Agaasime Ku-xigeenka Guud ee Dakhliga Cabdiqaadir Axmed Xaashi ayaa ka hadlay ahmiyadda tababarka, waxaan u sheegay in muhiimada kowaad la siinayo sidii loo xoojin laha hannanka cashuur-qadista ee ku qotonta Tacriifada cashuuraha Barriga.

Wasiir Ku-xigeenka Dakhliga Wasaaradda Maaliyadda ayaa dhankiisa soo jeediyay in loo baahanyahay in casharada ay qataan Saraakiisha Dakhliga ay dib ugu celiyaan xarumaha ay ka yimadeen.

Ugu Danbayntii Wasiir Ku-xigeenka Wasaradda Maaliyadda oo daah-furay Tababarka ayaa xusay in loo baahan yahay in xoogga la saaro fahanka guud ee Tacriifada, si loo horumariyo Dakhliga Guud ee Dowladda, waxana uu Wasiirku xusay in tababarada noocan oo kale ah ay joogtayn doonto Wasaaraddu laguna salaynayo kor u qaadista aqoonta Shaaqalaha Wasaaradda.

Baahintii

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland

BOOSAASO – Wasiiru Dowlaha Wasaaradda Maaliyadda Dowladda Puntland Mudane Maxamuud Shiikh Ciid ayaa kormeer shaqo ku tagay Bangiga Dowladda laanta gobolka Bari halkaasi oo ay ku kala war qaateen madaxda Bangiga.

Wasiirka ayaa la siiyey warbixino la xiriira dhismaha cusub ee Bangiga oo maraya heer gabogabo ah kaasi oo lagu dhisay isku tashi, waxana uu boggaadiyey dhismah la hirgeliyey.

Wasiirka ayaa sidoo kale booqaday Xafiisyada Bangiga ee ay ka socdaan shaqooyinka xisaabaadku.

Baahintii

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland

GAROOWE – Wasiir Kuxigeenka Wasaaradda Maaliyadda ahna Kusimaha Wasiirka Puntland Mudane Eng. Cabdulaahi ismaacil Maxamed ayaa shir guddoomiyey kulan looga hadlaayey horumarinta shaqada Wasaaradda.

Kulanka waxaa ka soo qayb galay Agaasimaha guud ee Wasaaradda Maaliyadda, Agaasime guud ku-xigeenka Dakhliga, ku-xigeenka Agaasimaha guud ee Maamulka,ku-xigeenka Xisaabiyaha Guud iyo Agaasimayaasha waaxyaha Wasaaradda Maaliyadda.

Shirkan ayaa diirada lagu saarey wax yaabaha u qabsoomay Wasaaradda 5tii sano ee la soo dhaafay, shaqooyinka hortabinta leh ee u baahan in xooga la saaro 5ta sano ee soo socota,Kor uqaadida dakhliga iyo Horumarinta Maamulka Wasaaradda.

Ugu dambayn Wasiir Kuxigeenka ayaa boggaadiyey aragtiyihiii shaqooyinka Wasaarada Maaliyadda lagu horumarinayey ee ay soo badhigeen Agaasimeyaasha Wasaaradda Maaliyadda.

Baahintii

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland

GAROOWE – Wasiir Kuxigeenka Dakhliga Wasaaradda Maaliyada Puntland Mudane Axmed Maxamed Bulxan oo uu weheliyo agaasimaha guud ee Bangiga dhexe Mudane khadar Ugaas Cabdi ayaa maanta kormeer shaqo ku tagay Kastamka Wasaaradda Maaliyaddu ku leedahay garoonka diyaaradaha General Maxamed Abshir ee magaalada Garowe iyo Kantaroolka Bari.

Wasiir Bulxan ayaa madaxda kastamka ka dhagaystay habsami u socodka shaqada iyo caqabadaha kala duwan ee haysta, waxayna kula dardaarmeen guud ahaan inay xooga saaraan sidii dakhliga kor loogu qaadi lahaa, loogana dheeraan lahaa wax kasta oo wax u dhimi kara dakhliga Dowladda.

Wasiirka ayaa sidoo kale kormeer ku tagey kantarooka Bari, waxaana uu halkaasi kula kulmay madaxda iyo shaqaalaha Wasaaradda ee ku hawlan soo saarista dakhliga.

Waxaa xusid mudan in Mas’uuliyiintan sidoo kale kormeerka ku weheliyeen agaasimaha waaxda furdooyinka, Agaasime ku-xigeenka guud ee Bangiga dhexe, Xisaabiyaha gobalka Nugaal iyo maamulaha kastamka.

Baahintii

Xafiiska Wacyi-gelinta iyo Warfaafinta
Wasaaradda Maaliyadda
Dowladda Puntland